《做老闆一定要識讓步》

星期二早上去到茶餐廳，見到一個客人好腌尖，連續換了兩杯咖啡，本來水吧唔肯換，佢話是客人自己加糖加得多，第一杯都算數，仲要換第二杯，水吧企硬唔換，老闆做好做醜，最後都換咗杯咖啡。水吧話老闆Chicken Out，老闆話，做老闆一定要Chicken Out ，如果唔識，做少好多生意，唔好講普通老闆，甚至連特朗普都要識Chicken Out，仲有一個專有名詞為他而設TACO，Trump Always Chicken Out。

讓步不代表Chicken Out

我記得初出道時，與一名客人傾合約時，做唔到老闆要求，始終埋唔到尾，老闆見咁嘅情况，主動要見個客，老闆出馬，讓了一步，合約立刻傾妥。我同老闆講，我們是收租佬，生意上是上門親家，點解要讓步？如果要讓步，點解唔畀我讓，唔需要老闆親自出馬，好似簽城下之盟，老闆話讓步並不是Chicken Out，而是解決問題的最佳方法，如果對方唔接受，準備搵另一個租客。

牙尖嘴利的白宮發言人萊維特話，在今個星期習主席與特朗普會通話，雖然萊維持沒有進一步表示將談些什麼，但我估計特朗普會在關稅問題上作出讓步，而中國亦會容許稀土出口，買多少美債，大家「四四六六」拆掂。我相信如果特朗普作出讓步，萊維特一定唔滿意，認為特朗普Chicken Out，萊維特唔明白，特朗普是生意人，Chicken Out或者作出讓步是令生意傾成的一種方法。嚴格來說，特朗普並不是Chicken Out，而是解決問題。