《做生意記住趕客容易搵客難》

星期一早上去到茶餐廳，有客人見老闆忙到氹氹轉，但仍然很努力招呼客人入座，唔想得罪任何一個客人，客人見到咁嘅情况，同老闆講既然咁忙，點解唔直接話冇位，叫人第二日才幫襯。

老闆話，做生意第一守則，就是千祈唔好趕客，趕客容易搵客難，唔識做生意的人才會趕客，以為客人一定要幫襯，其實客人有很多選擇，做得唔好，客人都冇埋。

美國總統特朗普唔知發什麼神經，突然間話美國大學唔接收任何國際學生，傳聞連丹麥王妃都唔收要離開，不過，現在口氣好似鬆鬆地，只是話唔收唔聽話的國際學生，老實說，特朗普都是生意人，應該知道趕客容易搵客難，如果美國唔收國際學生，不出3年，美國大學在學術領域成績就會大跌，到時候就算畀幾多獎學金都很難搵到優質國際學生，因為尖子學生都非常擔心，讀讀下突然又被踢走，咁就會好徬徨， 所以，特朗普改變有關政策亦是可以理解。

唔好講美國，香港銀行也是一樣，突然間話香港樓價會大跌，向準時還款的按揭客戶call loan（催收貸款），逼到不少客戶要賣樓來滿足銀行需要，現在銀行生意少了，唯有炒人來維持收支平衡，因為銀行家知道，失去的生意唔係一朝半夕可以搵得返，唔炒人連銀行都捱唔住，被炒的銀行職員會覺得好唔抵，他們認為只是執行銀行指令，點解要炒他們。

call loan後 銀行生意減

其實，在銀行方面來看，是職員趕客，不是銀行政策有問題，趕客不但令銀行收入減少，而且很難在短期內搵到生意，趕客容易搵客難，做生意的人都會明白的一條道理。