《冇得坐主家席 一定唔出席》

星期日早上去到茶餐廳，有一個在社會有名望而又家底甚厚的客人話，昨晚去了一個被人羞辱的宴會，並不是有什麼實質行動，而是宴會主人將他編入第二席，而坐主家席的人無論在社會地位與身家都與他相距甚遠。客人話就算坐主家席都已經屈就，何况坐第二席，當晚已經聽到不少閒言閒語，自己都覺得降低了身分，早知冇得坐主家席，一定唔會出席。

老闆話排名真係好重要，當日孔明將關羽、張飛、趙雲、馬超、黃忠編入五虎將，關羽認為黃忠不但太老，而且只是守城將軍，未參與過大戰，點可以編入五虎將，於是以不與老卒為伍拒絕接受；不過，關羽又點夠孔明講，三言兩語，又被孔明搞掂，最後五虎將分編成功。其實，關羽是有理由，如果黃忠行其他四虎將的路，早已「瓜咗」，邊度仲有得做五虎將。

穆迪降美評級應考慮影響

穆迪將美國評分降級，從最高的Aaa降至Aa1，其實是錯到不得了，雖然很多人話Aaa以及Aa1都是高評分，美國唔應該有問題，其實，就好似茶餐廳客人去飲，如果冇得坐主家席就寧願唔去，穆迪應該考慮到美國影響力，如果美國因為排名下跌而唔出席，效果就會大打折扣。

事實上，其他九個Aaa評級的國家，包括德國、丹麥、荷蘭、瑞典、挪威、瑞士、盧森堡、新加坡、澳洲等，經濟體系加埋都唔夠美國大，美國唔出席，什麼會議都大打折扣，美國出席，但又冇得坐主家席，即是攞架嚟丟。所以，唔明白點解穆迪要降美國評級，而美國冇反應，根本睇唔起穆迪，話之你點樣評，都費事理你，連不與老卒為伍都費事講。下次評級，穆迪死死地氣又會將美國升返去Aaa級，信不信由你。