2025/05/15
湯文亮
星期三早上去到茶餐廳，有客人話昨晚去尖東食飯，見到大富豪舊址裝修，一年前已經聽聞大富豪會重開，但過了咁耐，都見唔到有新的消息，是否得唔到中央政府同意，所以遲遲未能開業。
老闆話，香港的確缺少大型銷金窩，小型的仍然有，但未能登大雅之堂，大家都誤會了鄧小平話「馬照跑，舞照跳」的意思，一般人會以為，中央政府容許香港「馬照跑，舞照跳」。其實，鄧小平的意思是香港一定要有馬跑，一定要有舞跳，如果失去這兩條支柱，香港便會失去作用。好彩香港馬會做得唔錯，至於舞照跳，就要睇搞娛樂的人功力，連《中年好聲音》都搞得掂，跳舞點會搞唔好。
我初學做生意的時候，生意不會在上班時傾妥，我上班時大多數做一些文書工作， 就算與客戶食晚飯都唔傾，直至在夜總會，客戶在靚女面前話畀啲生意我做，幾咁有面子，現在沒有大型夜總會，生意是比較難傾。鄧小平早已了解這個道理，所以話舞照跳，但又唔能夠講得咁明白一定要舞照跳，被人誤會是一個框框。
夜場是一個人才訓練的好場所，如果能夠在夜場生存，在其他非專業行業，一定可以生存。夜場令到人有一個概念：錢是搵嚟用，用完又可以搵得返，無錢唯有勤力啲去搵。有不少老友期待大富豪重開，並不是有特別原因，只是希望一班老友隨時可以聚會，唔使一定要預約，飲吓酒，分分鐘可以飲到一些生意出嚟，舞照跳是沒有錯。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
