2025/05/13
湯文亮
星期日早上去到茶餐廳，老闆有同行搵佢吐苦水，話現在的生意很難做，但伙計很好，支持佢賣咗個自住單位繼續捱落去，在賣樓之前，問吓茶餐廳老闆意見。
老闆話伙計只是打份工，有糧出就會繼續支持，冇糧出就會話有汗出冇糧出，唔去勞工處已經偷笑，伙計說話是信唔過，不過無論如何，千祈唔好「棄居保帥」，連自住單位都賣走，冇人會可憐。
老實說，棄居保帥的確是好老闆，不過做老闆真係要為自己打算下，如果賣了自住單位繼續經營，如果失敗就乜都冇，但如果仍然有一個自住單位，日常生活就好容易解決，話唔定蟄伏一段時間又可以東山再起，甚至將自住單位賣走移民也可以，所以，千祈唔好「棄居保帥」，不過，如果有幾個單位又唔同，賣走自住單位之後可以住其他的單位。
在打工仔心態，見到老闆連自住單位都要賣，知道時日無多，有能力的就會搵過另一份工，冇能力的就會留低，見步行步，唔好講什麼士氣，根本好難翻身，如果係好伙計就應該勸老闆急流勇退，就算留低到最後收唔到薪水，都唔好喺傳媒面前大數老闆不是，甚至要去勞工處告老闆，雙方和平分手，為自己積下陰德。
老實說，求人不如求己，如果見到生意冇得做，做老闆的千祈唔好苦撐落去，應該果斷地結束生意，對所有員工依法賠償，咁樣做起碼唔會被人話係無良老闆，「棄居保帥」最後反而會被人話是無良，甚至要親自向傳媒解釋。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
