《沒100%勝算 唔好發動戰爭》

星期六早上去到茶餐廳，所有客人都講印巴空戰，印度主力用法國製的四代半戰機陣風，竟然輸比巴基斯坦用中國製的戰機殲-10C，而且戰績是5比0，唔計無人機，印度損失3架陣風，1架米格29，1架蘇30，印度總理莫迪顏面無光，巴基斯坦方面仲話已經收手，否則的話可以打落15架印度戰機，真係極盡侮辱，好似一場足球賽，已經贏咗5比0的勝方仲話已經留手，否則可以好輕鬆贏15比0。客人話唔明白印度，根本沒有百分百勝算，點解要發動戰爭。

老闆話，印度在發動戰爭之前，當然是認為自己有百分百勝算，除了在過去幾十年，每次印巴衝突，最後都是由印度取得勝利，在國際斡旋下結束戰爭，莫迪認為今次亦不例外，巴基斯坦有兩款主力戰機，美國製的F-16及中國製的殲-10C。

在今次印巴衝突之前，有傳美國表明唔准巴基斯坦用F-16戰機打印度，否則就關了戰機上導航，咁樣即是廢了巴基斯坦一隻手。在商言商，如果唔准用F-16戰機打印度，點解要買，不能用F-16，剩返只有殲-10C。而全世界都知道，殲-10C只是殲的入門版，還有11、15、16、20、35、36，面對如此「弱」的巴基斯坦空軍，印度點會認為自己無勝算，真係唔打就笨。

現在周街都笑莫迪，沒有勝算都夠膽發動戰爭，其實，莫迪已經比特朗普好，莫迪只是對巴基斯坦發動戰爭，特朗普向全世界徵收關稅，發動貿易戰，佢本來以為在發動貿易戰之後，所有國家領導人排隊「親佢屁股」，要求達成貿易協議，但原來除了英國之外，其他極度倚賴美國的國家都沒有與特朗普達成貿易協議。

中國更加唔使講，對美國出口份額只佔11%至14%，就算與美國脫鈎，中國仍然可以堅持一段長時間；反觀美國，超市貨架已經空虛，仲可以捱得幾耐真係唔知。不過，貿易戰總有終結的一日，到那時候，美國人民會發覺，物價比貿易戰之前貴了很多。