《美聯儲唔減息好過減》

星期四早上去到茶餐廳，有不少客人話非常失望，想唔到鮑威爾真係咁硬淨，美聯儲局不但唔減息，仲話美國通脹有上升風險，未來減息機率減退。不過，唔知點解，道指不跌反升，哈哈，道指升點算出奇，稍後大家便會發覺，香港1個月同業拆息，竟然下跌近1厘至接近2厘水平，兩年半以來首見，代表美元弱過弱雞，仲點可以減息。

老闆話鮑威爾做得啱，如果減息，不但令人誤會美聯儲局沒有威信，沒有代表性，甚至聽命於特朗普，唔減息就是釜底抽薪做法，減息無望，特朗普就要考慮減免關稅。而英國將會與美國簽署第一份貿易協議，這樣會是所有協議的藍圖，如果美國徵收英國10%關稅，無理由對其他國家徵收20%關稅，待美國決定減免關稅之後，確認通脹不會上升，美聯儲局才會減息。如果美聯儲局現在減息，就會令特朗普團隊誤會美國通脹受控，關稅就唔會撤銷，最後美國人才發覺全美國物價高昂，通脹失控，他們才是最終受害者。

一直以來，美國都很努力壓抑通脹，保持通脹在2%，但現實就是，10年期美債息超過4.4厘，通脹又點會2%，這是自欺欺人，而事實上美國一直在通脹「打假波」，不斷改變通脹計算方法，但美國人知道，通脹遠超政府所公報的數字，但點解又無人反駁政府，原因是大家都希望減息，如果話美國政府的通脹造假，豈不是永遠都無減息希望？

在兩者權衡利害之下，美國人接受通脹數據造假，本來已經俱備減息條件，但無端端加關稅，關稅令通脹上升，減息無望，所以，現在首先要取消關稅，令通脹下降，才可以減息。