《大撤退死傷均為精兵猛將》

星期三早上去到茶餐廳，有人客話，近日有不少投資者被銀行call loan call到失魂而被迫賣樓，由此可見，現在並非買樓的好時機，正是寧買當頭起，應該等投資者唔再賣樓，樓市止跌回升才買樓，問我是否同意。

我雖然賣緊樓，但唔同意現在並非買樓好時機，如果唔係銀行call loan，大部分投資者都唔會賣樓，並且賣的都是手上最優質物業。銀行call loan替打算買樓的人製造了機會，不但可以買靚樓，而且價錢又平了一大截，有能力買樓的人千祈唔好心領就算。

我的答案顯然未能令到人客滿意，老闆補充話，現在投資者大撤退，而大撤退有一個特色，死傷的都是精兵猛將。在三國時代，十八路諸侯討伐董卓，呂布副將華雄出戰，十八路諸侯唔肯派大將出戰，只派什麼上將潘鳳等，唔夠一個回合就被華雄斬首，及後才由關羽溫酒斬華雄。當時諸侯當中不乏名將，但個個都愛惜自己名將，唔想無端端犧牲他們，如果是大撤退就唔同，什麼名將都要抵擋追兵，諸侯認為最緊要保持自己條命。

樓市如果在風平浪靜時，投資者賣樓唔出奇，但只會賣一些不甚優質的物業，而且價錢絕不廉宜，但當他們被迫要賣樓，就會賣手上就算不是最優質，都是次優質的物業，而且價錢平好多。

所以，在太平盛世，千祈唔好同投資者買樓，因為買到的都是價高質劣物業，但現在唔同，雖然樓市不是風高浪急，但由於銀行call loan，投資者一定要賣走手上一些物業，唯有犧牲那些優質單位，有能力買樓的人唔買就真係幾蠢。