《用禮券反而訂唔到位》

星期二早上去到茶餐廳，有客人話昨晚去了一間名店食飯，在訂位的時候，對方問用現金、信用卡，抑或支付寶結帳，客人不以為意，順口回答話用禮券，點知名店話滿座。客人條氣唔順，無理由星期一都咁旺，於是再打電話去訂位，今次話用信用卡結帳，不但有位，而且位置甚佳，在食飯的時候發覺，入座率一半都無，但點解唔接受用禮券的客人訂位？

老闆話，做生意的人都知道，除了銀行禮券之外，其他禮券的價值都不及其券面值。名店唔接受禮券訂位，是恐怕用禮券的人霸佔了用現金或者信用卡客人的位置，令到名店的現金收入減少，但walk-in就唔同，名店見既然無客，就會接受用禮券的客人。不過，名店這個做法亦只是飲鴆止渴，唔會有人買名店禮券。

特朗普關稅政策 削弱美債吸引力

如果有人問邊間公司係第一名店，發行最多禮券，唔係LV，唔係「飛甩雞毛」，應該是美國，禮券的發行量無其他國家能望其項背，但唔叫禮券，叫債券。不過，美國與名店犯了相同的錯誤，就是不重視持有美債的國家，今次美國開徵關稅，除了中國之外，買美債最多的國家被開徵的稅率最高，沒持有美債的國家，例如俄羅斯、朝鮮、伊朗等，反而不會被開徵關稅，美國咁樣做令到持有大量美債的國家領導人頂住條氣，以後叫他們買美債就艱難，這就是近期美債滯銷，美債息急升的原因。如果特朗普對持有美債最多的國家收取最低，而沒有持有美債國家收最高關稅率，就會令到所有國家樂於買美債。

客人話如果前晚第一次訂位時話用信用卡付款，而對方話無位，改口話用禮券付款，對方立刻話有位，咁就會買多些名店禮券。