2025/04/22
湯文亮
復活節假期早上去到茶餐廳，有客人話近日幾個「財仔」不但call loan call到失魂，而且仲沒收咗不少物業，以銀主盤在市場發售，他鎖定那些銀主盤是目標，希望可以搵到一個「平靚正」的單位。不過，過了幾個月，個客人發覺「財仔」的銀主盤的確係平，但唔靚唔正，唔係低層就是方向欠佳的單位，眼見樓市正準備止跌回升，如果仲搵唔到靚樓，真係浪費一次大好機會。
老闆欲食海上鮮，莫惜腰間錢，如果打算買靚樓，就唔好同個「平」字掛鈎，否則一世都買唔到樓。那些優質單位業主如果要賣樓，一定會搵自己相熟的代理幫忙，如果隨便搵一個代理，很容易被人鋤價，所以，市面上不會有太多優質物業出售，買靚樓是可求不可遇。
又要平又要靚 或一世買唔到樓
如果要買靚樓，一定要同代理打交道，明知比市價稍高都要買，千祈唔好用銀主盤的成交金額來講價，銀主盤的成交價與私人放盤的樓價起碼相差15%，隨時可以達到30%。基本上是兩回事，如果又要平又要靚，可能一世都買唔到樓。
客人話一定有一些優質單位按畀「財仔」，業主無錢還物業就會變成銀主盤，「財仔」一定會放在市場出售，點解銀主盤沒有優質單位？
老友可能唔知道，優質物業的業主是不會將物業按畀「財仔」，他們知道「財仔」是無情講，如果未能及時還錢，物業就立刻會變成銀主盤以低價出售，很多時那些優質物業都會賣返畀「財仔」的自己友。所以，優質物業的業主如果真係有困難，寧願自己賣樓都唔會問「財仔」借錢，市場上的「財仔」銀主盤又點會有靚樓。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
