2025/03/27
湯文亮
星期二早上去到茶餐廳，見到一個穆斯林客人在座，老闆問點解成個月唔嚟，係咪返咗新加坡，客人話係有幾日返咗新加坡，但唔嚟原因是齋月（Ramadan），日出後唔可以食嘢，要等到日落。有一件事不得不說，新加坡真係比香港叻好多，不但準備派錢，而且仲有百億坡元盈餘，睇返香港，不但有幾百億港元赤字，而且仲無派錢。
老闆有少少㷫話，又唔可以咁講，新加坡派錢之後，或者跟着就會宣布加銷售稅（GST），現在是9%，很快就會加多1%，以為幾個月就可以攞返錢，新加坡人真係做咗老襯都唔知。
倘經濟未保持增長 銷售稅礙市民消費
客人話最低限度，新加坡無關稅，其實客人唔知道，銷售稅也是關稅。新加坡是一個沒有資源，根本無可能開徵關稅，所以開徵銷售稅，關稅是以入口價開徵，而銷售稅是以零售價開徵，10%銷售稅，隨時多過20%關稅，而且銷售稅加上人工、租金、水電等固定開支，做生意的人支出大了，商品價格就要提高，那些本來從關稅抽唔到的稅，最後亦不能倖免。
10%銷售稅其實是很高，當經濟增長未能保持，市民搵唔到咁多錢就唔敢消費，無人消費，經濟難有起色，這是唐英年解釋當日唔開徵銷售稅的原因。
很多人唔明白，香港展銷行業做得咁好，新加坡配套齊全，要贏香港很容易，但點解香港可以在展銷行業拋離，是否新加坡政府「放水」？當然唔係，20幾年前，新加坡都做得很好，但自從開徵GST之後，展銷行業便一落千丈，試問邊到會有大手買家在展銷期間買貨願意付銷售稅。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
