2025/03/26
湯文亮
星期一早上去到茶餐廳，有客人話上周末去睇二手樓，打算幫子女買樓，講都無人信，每一個樓盤都有很多人參觀，內地人同香港人都有，他們有一個共通點，就是如果有十幾個巴仙賺，「摩」番一轉都無問題。事實上，近日有不少賺錢「摩貨」成交，與蝕本的大約九比一，但奇怪點解中原指數不斷下跌，上星期仲跌超過1%咁多。
老闆話，現在買樓的人無論是內地人或者香港人，大多數是用家，但唔知點解，「瘦田無人耕，耕開有人爭」，買入之後代理不斷話有人畀錢買家賺，由最初的5至7個巴仙到十幾個巴仙，買家見到有錢賺，而且問銀行借錢又咁麻煩，最後都經唔起代理游說，將剛買入的單位賣走，身分亦由用家變炒家，而炒樓的第一個條件，就是樓價有很大水位，如果無水位，就算幾叻都做唔到炒家。
不要輕易賣走自住單位
做炒家一定要遵守一個戒條，如果無人買可以上會就上會，千祈唔好諗住減價出售，因為只會畀新買家鋤價，隨時損失所有訂金，反之在上會之後，隨時會有人畀錢佢賺，甚至會賺好多。
當市場上有炒家，樓市很快就會止跌回升，因為炒家見有錢賺，有可能將剛買入的單位賣走，短期內市場反彈十幾巴仙絕不出奇，但如果無炒家，或者好似以前咁樣受「辣招」所限，炒家絕迹市場，以低價出售的單位就無咁容易賣出。樓價就算唔跌，都只能夠在低位維持一段時間，不會止跌回升，當市場出現炒家，就是樓市反彈信號，不得不小心，千祈唔好咁容易賣走自住單位。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
