2025/03/24
湯文亮
作者指有些小型「財仔」見自己生意唔掂，追數又困難，最後與做轉按的「財仔」合併，美其名是合併，其實是成間賣畀做轉按或者較大的財務公司，這是「財仔」數目大減的原因。
【明報專訊】上星期六早上去到茶餐廳，有客人話發覺一件怪事，從公司註冊處登記知道該條街減少了兩成舖頭登記，但今早嚟茶餐廳時專登睇吓條街有邊間舖頭空置，但竟然無吉舖，點解咁奇怪。
老闆話有乜咁奇怪，他剛剛買入了隔離相連舖，成交之後將會打通，茶餐廳面積會擴大1倍，條街仍然是無吉舖，但註冊登記就減少一間。大家可能唔知道，「財仔」的數目相比全盛時期減少了15%，理由同條街舖頭減少的情况差不多，不少「財仔」借錢畀人買樓之後，再將抵押物業打包轉按畀其他「財仔」做按揭，取得的款項再借畀人，的確可以多做生意，但亦為自己暗藏殺機。
合併令財務公司數目大減
倘若債仔唔還錢而自己又無錢還，打包轉按的物業就會變成銀主盤，被做轉按的「財仔」以銀主身分將物業出售，由於打包轉按的物業按揭成數會較低，就算有損失都不大，但將物業打包轉按的「財仔」可能要蝕本，甚至蝕到連渣都無，最後不得不執笠。
亦有一些小型「財仔」見自己生意唔掂，追數又困難，最後與做轉按的「財仔」合併，不過美其名是合併，其實是成間賣畀做轉按或者較大的財務公司，這是「財仔」數目大幅減少的原因。最後有一些「財仔」為了多做生意，甚至用自己的財務公司股份問其他「財仔」借錢，還唔到錢就要將成間財務公司送畀人，雖然數目不多，但始終是令「財仔」數目減少原因之一。
至於問「財仔」借錢買樓的債仔唔使講，在樓價下跌三成的情况下，早已是負資產，反而希望自己的銀主盤唔好咁早被賣走，他們可以住多一段時間。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
