2025/03/19
湯文亮
星期二早上去到茶餐廳，老闆話有行家嚟借人，原因是行家有幾個伙記辭工，老闆話無問題，剛好有一個伙記準備放大假，而佢又知道那名伙記沒有打算去旅行，只是在香港休息幾日。不過，他不方便叫伙記去做散工，叫行家自己問，那名伙記二話不說就拒絕了，老闆行家自言自語話真奇怪，已經問過幾個人，他們連工錢都無問就拒絕，究竟點解。
行家走後，老闆問伙記，既然唔打算去旅行，點解唔「炒散」，幾日都好，人工唔錯。伙記話見過鬼怕黑，他試過去老闆行家的茶餐廳「炒散」，一個人頂兩個人工作，生意做多了，佢自己都做到散，但老闆行家始終唔滿意，仲話以前請的散工好過佢，所以今次明明得閒，都唔去「炒散」，伙記咁講，大家都明白。
政府工老闆多「say no」
大家讀HR 101，一定會提到3M理論，分別是Money、Morale、Motivation，三者之中，金錢的確是非常好推動力，正所謂「有錢使得鬼推磨」，但唔係最好，打過工的教授會話：「the best motivation is say yes」，未打過工的教授就講唔出這個道理，只會話「MMM」。有客人話，唔怪之得阿媽叫佢唔好打政府工，因為普通打份工只有一個老闆，打政府工有無數咁多老闆，而且大部分只會講no，唔會講yes，人工又唔係咁高，點解要咁受氣打政府工。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
