2025/03/04
湯文亮
星期日早上，茶餐廳比較多客人，大家只有一個共同話題，就是俄烏衝突變成「特澤衝突」，有不少人唔明白，烏克蘭總統澤連斯基點可以同金主衝突，雖然美國總統特朗普唔係真正金主，但美國係，而特朗普是美國代表，所以，現在烏克蘭金主應該是特朗普而不是拜登。
有客人問點解會出現特澤衝突，老闆話很簡單，打死狗講價，老闆話在開始做茶餐廳的時候，有一個物料供應商無條件賒數畀佢，一個月後，老闆打算找數，物料供應商話不用急；半年之後，老闆收到物料供應商張單，竟然高市價很多，唔找數都可以，只要將部分股權轉讓畀物料供應商。在無前期協議之下，老闆唯有求助家人，忍痛找咗條數，以後都唔敢在未知價錢下亂賒數，否則打死狗講價是很難搞。
料澤連斯基落台 下任總統找數
俄烏衝突在開始之後，本來雙方可以很快坐低談判，但在歐美國家煽動之下，加上武器源源不絕，衝突繼續下去，當然澤連斯基亦擔心日後要找數，但歐美國家認為俄羅斯有幾千億美元資產可以沒收，只要打敗俄羅斯，烏克蘭不但毋須找數，仲可以分到錢作戰後重建。
不過，打了3年，只有5000萬人口的烏克蘭有1000萬難民，國土又唔見了五分之一，美國見打落去會愈輸愈多，立刻埋單計數，1000億美元舊武器，畀個折頭都要用價值3500億美元稀土償還，打死狗講價，澤連斯基不服都冇用，相信澤連斯基會落台，由下任烏克蘭總統找數。所以，光棍佬教仔，便宜莫貪，唔使錢原來是最貴的。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
