2025/02/26
湯文亮
早上去到茶餐廳，有客人話有一個朋友睇啱一個單位，由於業主等錢用，價錢非常之抵，但是他的朋友認為既然業主等錢用，點解唔鋤價，於是大筆一揮，鋤價10%。到最後，業主將單位賣了畀其他人，客人的朋友話今次真係走寶。
老闆話，現在賣樓的人十之八九都是等錢用，唔會「無啦啦」賣樓做定存。賣樓的人有一個心態，就是到價就賣，當財務問題解決了，唔再等錢用，就唔會繼續賣樓，不少有能力買樓的人以為業主等錢用而鋤價，買唔到之後又呻笨。其實，買樓計自己數，唔好計人哋數，人哋個算盤其他人又點會知。
現在急於賣樓的人很大部分是當日買樓時沒有計掂自己條數，以為樓價必升，唔買就笨，甚至問財務公司借錢買樓，現在樓價下跌，利息又高，最後所買的樓宇即使沒有變成銀主盤，但都要被迫出售。業主不但損失所付首期，甚至會欠下一身債，所以，在買樓之前計掂自己條數是很重要。
樓價維持在現有水平已經有大約半年，其間有不少對於樓市的負面報道，但仍然未能使樓價下跌。當物體不能下跌時，就是反彈先兆，反之不能繼續上升，就是下跌先兆，除非其間出現非常負面的消息，例如利息上升，或者有大量市民離開香港，政府拒絕優才專才來港發展，咁樣就會令到樓價跌完再跌，計掂自己條數都要輸錢。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
