《人比人 氣死人》

中國外長王毅出席德國慕尼黑世界安全會議期間，被記者問及中美關係，他引用金庸《倚天屠龍記》的金句：「他強任他強，清風撫山崗，他橫任他橫，明月照大江。」

如果不是金庸迷，未必知道這幾句話是《九陽真經》口訣，而《九陽真經》是金庸筆下各種武功中最正氣，只有《易筋經》能夠分庭抗禮，對立的當然是《九陰真經》。

當一個人在出世時已經與其他人作出比較，有人會對小朋友的父母講，咁大個仲未識得行、未識得講說話、阿邊個邊個個仔一早識行識講說話，搞到父母非常不開心，長大之後大家又會將某人與其他人比學業成績、比工作、比成就。老實說，提出比較的人好似今次提問的記者一樣，是帶有挑釁性，如果外長回答，美國都唔係好叻，我們有很多領域都已經超過美國，我相信就會被外國傳媒大做文章，說外長小氣，一句他強任他強就將大事化無了。

有老友話，雖然有很多人睇過《倚天屠龍記》，但未必會留意到「他強任他強」，就算有留意到都唔知點解，面對類似挑釁，又如何回應，我記得在我小時候，雖然我的學業成績不錯，但仍然有人將我與其他人優秀的同學比較，我阿媽當然唔識得講「他強任他強」，但佢會話人比人，氣死人來回應，那些挑撥離間的人就會好冇癮而自動離開。不過，我阿媽可以咁講，外長唔可以咁講，否則就會被外媒話冇文化，於是拋出一句「他強任他強」，老實說，能夠訪問外長的記者，大多數是中國通，甚至有可能讀過《倚天屠龍記》，知道外長冷靜面對今次挑釁，同昔日挑撥我阿媽的人一樣，挑釁者會靜雞雞離開。