2025/02/11
湯文亮
有一個大慈善家最近搞宴會，今次與以往不同，以往參與的人是人山人海，今次是寥寥可數，大慈善家唔係幾明白，佢講明在宴會上會宣布捐一大筆錢畀唔同的人或者慈善機構，但點解他們仍然唔出席，唔通有錢都唔要。
大慈善家可能忽略了一件事，就是以往只是捐錢，唔會要求受惠的人捐返轉頭，所以，有錢佬是互相不會捐錢，因為他們知道，今日我叫你捐，明日你叫返我捐，最好是「親家兩免」。現在大慈善家要求受惠者立下字據，當大慈善家有要求，受惠者要捐返轉頭，大慈善家咁樣做，嚇到大家都唔敢叫佢捐錢，因為叫佢捐即是叫自己捐。
做大佬須蝕底畀自己馬仔
美國現在好似一個大慈善家，以往向中國開徵關稅，不少國家都非常贊同，但是向中國開徵關稅，屬於殺敵一萬，自損七千，開徵關稅只是羊毛出在羊身上，搞到美國國內通脹上升，利息上升，而美國是一個負債非常重的國家，利息上升蠶食了美國收入，只向中國開徵關稅，實在幫唔到幾多，唯有向所有國家開徵關稅，才可以收到預期效果。
特朗普可能唔知道，咁樣做就會令美國變成一個不受歡迎的慈善家，如果要畀關稅，就冇必要將貨物輸往美國，唔使幾耐，美國各項物資的供應都會減少，供應少，物價自然會上升，受苦的不單止是美國人，美國政府亦失去一呼百應的威勢，甚至會令人敬而遠之，失去了大國地位。老實說，江湖人知道，做大佬一定要蝕底畀自己的馬仔，否則就冇人跟佢，又要威，又向自己馬仔攞着數的大佬真係未見過。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
