《唔准外賣入邨 受害的是邨民》

昨晚與幾名老友食飯，其中一個話以後要多啲出街食飯，原因是剛剛收到屋邨管理處通知，為了防止閒雜人等，以後唔准外賣入邨，自己又唔識得煮，唯有多些出街食飯。

大家叫老友不用擔心，這些不合理行政指令很快就會撤銷，原因是唔准外賣入邨，做外賣生意的餐廳一定有影響，但是最大受害者是屋邨內的居民，老友所住的屋邨有很多年輕人，他們如果有時間就會加班加點，唔會浪費時間去煮飯，屋邨居民一定會向管理處施壓，唔好講一個小小屋邨，就算大如美國都頂唔住。

周三早上，很多人都收到一個稍後被證實的消息，就是美國郵政停止接收來自中國內地及香港的包裹，大家都嚇了一跳，現在輸去美國的大小包裹數量極大，對商品供應起積極作用，如果唔准包裹去美國，極有可能造成某些商品有加價壓力，最終受害者是美國人，所以在12小時之後，美國郵政恢復接收來自中國內地及香港的小包裹。由此可見，美國對行政指令的反應極快，如果得不到預期效果就會立刻撤銷，唔單止對來自中國內地以及香港的禁運，亦暫停對加拿大及墨西哥加徵的關稅，說到底是因為加墨反徵美國關稅，最後受害者反而是美國人，如果加墨唔作出反擊，恐怕美國唔會暫停加墨關稅。

反應快是政府官員的一個首要條件，政府推行各項政策未必每一樣都適合香港，如果發覺不適合就要立刻或者在適當時候撤銷，在這方面以前的香港政府就唔合格，明知打擊樓市「辣招」是影響香港經濟，優才專才唔會嚟香港，令樓價下跌，財赤連年，有咁嘅效果，仍然要等15年，直至去年政府才撤銷「辣招」。其實，勇於撤銷不利政策是對市民負責。