2025/02/04
湯文亮
年初六返工，秘書話今個星期有很多銀行家嚟拜年，部分仲安排食飯，按平時我所講的理論，銀行家積極同客戶拜年，今年樓市都唔會太差，雖然恒指出師未捷，但大多數分析員仍然認為恒指今年有20％升幅，有玄學家則話股樓會皆衰，究竟玄學家與分析員有何分別。
其實，就好似考試的學生，分析員對每一條題目，都是以自己理解作答，如果唔及格就要自己負責，冇得賴，就好似我話樓市今年有10%至15％升幅，如果達唔到這個目標，就算我自己唔承認，都會有人話我睇錯市。
玄學家就好似一些學生，用前人理論為自己面對的題目作答，如果答得啱，自己就攞全功，如果答錯了，學生就會話不是自己的錯，是前人的理論錯誤。
所以，很少聽到有人指摘玄學家預測錯誤，因為大家都知道，玄學家一定唔會話自己錯，而是上天給予的指示是錯誤，既然唔關玄學家的事，大家亦都無謂指摘他們。
有人話玄學家比較團結，大多數玄學家都會話今年股市、樓市都唔好，而分析員就冇咁團結，所以，對於股市、樓市預測，不同分析員有不同答案。
其實，這並不是團結問題，玄學家是一本通書睇到老，所以，大多數玄學家對未來形勢預測都是一致。
到了年尾，如果預測不準確，分析員就要自己承受後果，玄學家就不需要，他們會話，依書直說，並無虛言，唔準確都唔關他們的事。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
