《銀行唔放錢 小心樓價飈升》

很多人有一個錯覺，以為銀行收緊銀根，令到打算買樓的人買唔到樓，需求減少，樓價一定會下跌。理論上是無錯，但銀行同時唔借錢畀地產商投地起樓，供應同時減少，有利樓價上升。不過，時空是不同，次序亦有先後，首先，打算買樓的人借唔到錢買樓，樓價當然會下跌，但唔會無止境下跌，到了某個水位就會停止，甚至止跌回升，如果有足夠供應量，樓市便會穩定下來，問題可以說是解決了，不過，並不是這麼簡單。

在樓價下跌幾年期間，地產商見成本高漲，又借唔到錢，順理成章減慢建樓速度，但今次地產商仲大鑊，銀行除了唔借錢之外，仲向地產商call loan，只有少數大型地產商可以頂得住，中小型地產商不但停建，甚至要將地盤出售，無形中減慢建樓速度。

供應在樓價平穩之後就會出現短缺，當需求量增加，樓價就會飈升，而且遠水不能救近火，樓價會升得好急而且會持續很長時間。如果銀行堅持唔放錢，或者可以壓止樓市升勢，樓價唔係唔升，而是無升得咁急。不過，銀行見到樓價上升，按揭生意是非常穩陣的生意，不但借錢畀人買樓，甚至提供回贈，令到樓市升勢如火上加油，所以，銀行唔放錢最終令樓價飈升並不是天方夜譚，而是天道循環而已。

有人話，樓價下跌，政府應該出招救樓市，我認為千祈唔好，樓市下跌是正常現象，已經跌了不少，政府救唔救都會掉頭回升，如果政府現在出招救樓市，他日當樓市飈升，一定會有聲音指摘政府，並且要求政府出招打壓樓市。今日唔救，他日樓市上升，要求政府打壓樓市的人就沒有理據，况且，政府救樓市反而是一個負面信息，唔救好過救。