《樓價無升跌已可加強入市信心》

有老友話，年初有報紙訪問了50名地產界精英，差不多全部都話今年樓價會升5%至10%，與我的預測一樣，既然大家預測一致，今年樓價是否會升5%至10%？

我同老友講，千祈唔好咁認真，50名精英與我都是以「賣花讚花香」心態預測樓市，如果話樓價下跌，邊度會有人買樓。所以，業界精英甚至包括小弟在內的預測並不能作準，當花邊新聞睇吓就好啦。

今年很少大行預測樓市，原因是雖然最壞情况已經過去，但亦沒有特別利好消息，樓市上落都有機會，萬一話升5%，結果跌5%，就會被人話預測唔準確，倒不如不作任何預測。不過，又不是所有大行不對今年樓市作出預測，起碼瑞銀大膽話今年樓市無升跌，無升跌都是預測。

瑞銀不只大膽，而且仲好準，瑞銀預測2023年樓價下跌5%，2024年下跌7%，其實已經非常接近，今年預測無升跌，我估計雖不中亦不遠矣。其實，無升跌是一個非常大膽預測，因為在政府「撤辣」，又放寬移居香港的人數，甚至連銀行亦提高按揭成數，去年樓價仍然下跌6.5%，今年政府根本無招可用，樓價唔跌是很難，更何况銀行暫時對物業的借貸不感興趣，沒有銀行支持，樓價又點會唔跌，瑞銀的預測是否太過樂觀？

大行不會無的放矢，瑞銀應該知道，國際投資者對香港房地產有興趣，他們並不需要銀行支持，即使銀行唔放貸，他們亦有能力買入心儀物業，所以才夠膽作出樓市無升跌的預測。否則，就幾大都話跌少少，而事實上無升跌是一個加強買樓人士信心的預測，因為有很多人認為買樓唔升都唔緊要，最緊要是唔好跌。