2025/01/06
湯文亮
唔記得幾多年前，有老友話要離婚，大家苦勸無效，突然間有另外一個老友叫他想一想，當日結婚是絕不容易，唔知什麼原因，雙方家長都唔同意，但最後排除萬難，又得到老友支持，始終結咗婚。但現在一切穩定，雙方家長亦接受這段婚姻，點解要離婚，叫老友再三考慮。經過深思熟慮，老友至今不但沒有離婚，而且仲非常恩愛。
有年輕朋友打算將已經住了10年的單位賣走，理由是現在供樓比較辛苦，賣走之後租樓住，所得到現金可以幫補租樓，由於不需要供樓，生活就比較輕鬆。年輕朋友問我意見，我話沒有意見，如果有需要，例如要移民，或者長期供唔起樓，就必須要賣樓，否則，就要回想當日買樓的時候是幾咁辛苦，當時唔係有朋友借錢，父母簽擔保，根本買唔到樓。
縱睇啱市日後也難再買樓
今日賣樓的確可以改善生活質素，但以後要再買樓就唔係咁容易，就算睇啱個市，樓價下跌，父母已經無能力簽擔保，朋友亦不會借錢畀佢買樓，有可能要一直租樓住，很難再買樓。年輕朋友可能唔知道，10年前一般人的手頭現金都比較鬆動，朋友有需要或者都會幫手，現在即使有心，都無力。
同樣情况，10年前不但利息低，而且銀行有大量資金，按揭貸款比較容易，但今日就唔同，不少人落了訂都做唔到按揭，如果那些人是在10年前申請就無問題，今日賣了樓的人要有心理準備永遠都買唔返。所以，打算賣樓的人唔好睇眼前利益，或者預測樓價繼續下跌，而是回想當日買樓是幾咁困難，離了婚再結婚的人百分比不高，但仍然高於賣了樓可以再買返樓。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
