《今年樓市與09年相似》

2024年終於過去，樓市埋單計數，樓價下跌了7%，成交量則升了25 ％，量升價跌，很多專業人士睇唔通樓市。回想2009年開始時，有很多測量師行都預測樓市大跌，事實上樓市不跌反升，到了年尾，樓價竟然升30%，政府不得不出招壓抑樓市。第一招就是要加印花稅，但政府只加高價物業的印花稅，搞到打算買豪宅的人改炒細價樓，令到細價樓升幅勁過豪宅，政府不得不出招壓抑樓市，直至今年初才將所有「辣招」撤銷。

2025年樓市與2009年將會很相似，首先是在大家唔睇好情况下樓價有一定升幅，當然唔會升30%咁多，但升10%至15％是有機會。相比2008年，2024年銀行call loan更勁，不少投資者要賣走手上物業解決問題，估計2025年銀行唔會call loan call得咁急，樓價不但可以穩定，甚至有機會反彈。

2009年樓市雖然反彈，但政府同時出招，對樓市升幅有牽制作用，估計2025年，樓市即使反彈，政府都唔會再出「辣招」，沒有「辣招」牽制，樓價可以升得很誇張。所以，今年千祈唔好睇淡樓市，更加唔好將自住單位賣走，否則就後悔莫及。

人口是樓市升跌最主要原因之一，目前政府以專才、優才、投資移民等方法搶人才，估計每年最少可以增10萬人，相等於2.5萬個住宅單位。雖然專才未必會即時買樓，但唔買都要租，做成2024年大部分時間租金上升，樓價下跌，到了2025年，不少租樓的專才轉租為買，這股龐大購買力不容忽視。總括來說，可以用刼後餘生來形容2025年與2009年樓市相似之處。