《玩比特幣唔會輸死人》

有老友話非常後悔兩三年前無買比特幣，如果當時有買，現在就唔會咁頭痛，老友話不是後悔比特幣大升，而是如果當時買比特幣，就唔會問銀行借錢買樓，今日就唔會被銀行call loan。我話佢搵嚟講，買樓不但可以用晒自己全副身家，仲要問銀行借大筆錢，試問點會用晒成副身家買比特幣，身邊朋友很少擁有超過10枚比特幣，就算擁有10枚，都只不過是百多萬美元，800萬港元而已，就算輸晒都唔會輸死人。

跟跑馬一樣 買冷門為小注怡情

很多人唔明白，最危險投資其實是最安全，就算是定期存款，如果可以接受存款的財務公司執笠，唔會有很多人遭受損失，就算那些財務公司所畀的存款利息高銀行很多，幾大膽的人都唔會將自己全副身家攞去做定存，最多是在政府擔保額之內。

如果大銀行執笠又唔同，分分鐘有不少人會傾家盪產，就算跑馬都是一樣，冷門馬不會輸死人，因為買冷門的人是小注怡情，熱門馬就唔同，分分鐘有人瞓晒身去買。

老友問比特幣幾錢爆煲，我相信暫時唔會，直至有大量銀行或者財務機構願意借錢畀人買比特幣，因為如果無人借錢，即使幣價下跌，比特幣的持有人都唔會有壓力將比特幣賣走，但如果有人借錢就唔同，如果幣價下跌，那些人就會施壓，要求借錢的人賣走手上的比特幣，多了賣家，幣價點會唔跌。

很多人雖然沒有直接買比特幣，其實間接買了，因為那些人如果將資金買基金，而基金則投資比特幣，幣價狂升，基金可以根據合約付高息；幣價下跌，基金不但沒有能力派息，甚至連本金也輸掉，那些投資者是最唔抵。以為安安全全，就算利息不高都唔緊要，原來最安全的投資是最危險。