2024/11/29
湯文亮
不時有內地老友到我屋企食飯，當中有人見我屋企的裝修唔錯，希望我介紹負責裝修的師傅，我通常會話，那個裝修師傅價錢貴、交貨慢，而且脾氣很大，真的唔敢介紹。我的老友都是明事理的人，他們亦知道「不做中、不做保、不要介紹裝修佬」。
有不少人試過將自己用過，認為滿意的裝修師傅介紹畀老友，但唔知點解，自己滿意，別人投訴，最後老友都無得做。問裝修師傅點解做得唔好，答案一定是客人太過腌臢，做完又改，改咗又唔找數，單裝修工程最後要蝕本。
問自己老友，答案剛剛相反，一定會話裝修師傅收咗錢就失了蹤，唔繼續畀錢就唔開工，所聘用的人又唔夠班，搞到佢要搵其他裝修師傅執手尾，亦唔會打算付尾數。在咁嘅情况下，你叫介紹人點算，所以，唔做介紹人就最好。
裝修出問題都會歸咎介紹人
如果裝修師傅用自己團隊做，就算有問題都可以解決，但做得好的裝修師傅生意又會幾好，他們有可能外判一些工程畀其他裝修師傅，自己只做監督，做外判的師傅覺得被人賺了一筆，水準便會出問題，如果業主唔滿意，可能要搞一段長時間才可以解決。
最後，他們甚至會將責任歸咎於介紹人，業主會話點解可以介紹一個咁不負責任的裝修師傅畀佢，而師傅則會話業主太過腌臢，早知道唔接這單生意，所以，無必要都唔好介紹裝修師傅畀人。
其實，打算裝修的人可以搵一些工程公司，明碼實價，雖然好似貴了一些，但最後埋單計數，可能比老友介紹的裝修師傅平很多。所以，無必要都唔好叫人介紹裝修師傅，更加唔好主動將裝修師傅介紹畀人，因為唔會有好結果。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
