郵輪假期

一連兩篇都係講颱風, 坊間有好多媒體最近兩周都不停地談論到家居保險、樓宇結構保障等等嘅理賠, 相信好多讀者都睇到有d悶, 所以今篇就停一停, 講下其他題材, 緩衝一下吧。 話說筆者有個好友, 她父母剛於去年雙雙退休, 享下清福, 不時約d老友記呢到去嗰到去, 遠至東歐, 近至祖國, 最後情歸郵輪, 原來係坐郵輪唔駛煩, 可以各自為政, 又可以柴娃娃, 即係伯友想瞓多陣, 世伯同其他老友記自己去揾節目, 到伯友瞓夠精神, 咪一齊去玩囉。 講起呢位伯友, 由年青時到依家一把年紀都鬼咁精靈, 去旅行識買旅遊保險, 連坐郵輪都識得買郵輪保險架. 你可能會話識得買郵輪保險有幾精靈？因為真係有人會走去買旅遊保險, 而唔知應該買郵輪保險至恰當。 郵輪旅遊保險係有專屬保障, 相對於普通嘅旅遊保險有以下嘅分別: 1. 提供非自願更改或取消原定停泊港口津貼 2. 保障因旅程延誤未能在海外趕及登船而取消郵輪旅程 3. 岸上觀光行程津貼提供取消或更改行程現金津貼 4. 為登船后的行李延誤提供額外津貼 5. 郵輪緊急通訊費用保障涵蓋在郵輪上因緊急事故而需要使用衞星電話、手提電話漫遊或郵輪無缐網絡費用 大家要留意以上嘅保障範圍, 通常都有規限, 例如: 因爲意外或患病(要有註冊醫生證實需要立即入住醫院接受治療及不宜繼續旅程)或突然發生不可預見嘅惡劣天氣、天災(包括地震、海嘯、火山爆發)、暴動、碼頭或火車站關閉等先會理賠, 如果你瞓晏咗遲到機場、碼頭、車站所引起嘅, 就要閣下自理喇。 下次坐郵輪, 記得唔好買錯保險呀。