2024/10/31
湯文亮
在疫情期間，有老友問，我的員工有無自動減薪支持公司，我話唔好講笑，我的同事很現實，收少個「崩」都唔肯。老友話佢就唔同，他的員工願意減薪一半，如果日後賺到錢就補返，如果蝕本執笠算數。
老友以為執到寶，成班員工對佢好好，其實班員工害了佢，老友本來打算執笠，但得到員工支持，一於繼續做落去，令到佢蝕多啲，如果當日執笠，起碼還有二三千萬元揸手，現在不但沒有，而且仲欠落一身債，最慘是現在不少員工另有高就，根本唔夠人做嘢，想唔執都唔得。
中小企貸款好似班減薪員工一樣，以為幫到中小企，其實是害了他們。不少中小企老闆在疫情期間本來打算執笠，但無端端得到中小企貸款，員工繼續有糧出，不過生意仍然蝕本，中小企的貸款又唔係唔使還，就算還息不還本都係要還，捱到今日都捱唔到明天，最後結局都是執笠。
老闆無私人資產無得講，如果有，那些私人資產恐怕會被沒收，如果政府不推出中小企貸款，那些老闆在今日最低限度仍然可以擁有自己的私人資產，今日就乜都無，中小企貸款是否害了中小企？
有人話我打橫嚟講，中小企老闆可以唔申請貸款，我認為有多少難度。首先有錢借點解唔借，就算老闆唔想借，員工都會希望佢去借，因為老闆借了錢員工有糧出。
不過話分兩頭，政府唔推中小企貸款又唔得，仲有咁多儲備，如果唔救中小企是會畀人鬧，當中包括無糧出的員工，有人話今次中小企貸款，最少有25%「打水漂」，就算「打水漂」我都認為是值得的。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
