2024/10/28
湯文亮
近日有搞展覽的人話，市民北上消費，假日留在香港的都是窮鬼，所以年宵攤位大多數以底價租出。另外，香港有一個美酒佳餚巡禮，參展的人話第一日人流不多，打過和已經算唔錯。
其實我唔係幾明年宵市場的投標者點解咁灰心，去年大多數年宵攤位的參加者都有不俗利潤，仲表示今年一定會繼續，點解突然失去信心，或者唔可以講得太好，無謂有人爭，我們又即管睇吓香港年宵花市是不是那些人講得咁灰。
至於美酒佳餚巡禮，並不是零售市場，政府搭一個平台出嚟畀參展商，希望他們用作推廣自己產品，尤其是政府大減烈酒稅，唔趁機會推廣就笨；不過，颱風潭美到訪，3號風球高懸，會場內的維港廊暫停開放。
倘無事呻吟 天都唔幫
我認為睇香港經濟，要睇3個展覽，如果3個展覽都唔掂，香港真係唔掂。首先是「工展會」，大多數參展商都會以推廣價賣自己代理產品或自家產品，最重要一點是貨真價實，沒有假貨，除了香港人買之外，仲吸引不少內地買家，現在香港追求「平」，內地人追求「正」，所以，只要貨物是正貨，內地人唔介意畀高價，更何况有推廣價。
第二個展是「年宵花市」，本來過年行花市是一個活動，與經濟好壞無關，就算經濟差都會行花市，最多買少一些年花或者過年用品，現在畀參展商話留在香港過年的都是窮鬼，搞到我都唔敢去，容乜易被人話我係窮鬼。其實，過年能夠留在香港的才不是窮鬼，全年都可以同人去旅行，點解要過年去貪同人迫？我相信今年年宵花市唔會差，除非落雨，咁就冇得講。
第三個展是「會展」，如果冇參展商來港，香港真係唔掂，但我了解到今年會展的生意很好，不少參展商已經預訂明年的參展攤位，所以，千祈唔好無事呻吟，否則連個天都唔幫。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
