《WFH令經濟衰退》

在疫情期間，外國與香港有不少公司提倡WFH（Work From Home），甚至大讚WFH的好處，除了可以租用較細寫字樓之外，通勤時間減少，有更多時間做公司工作，我話發夢冇咁早，WFH最終令經濟衰退。不過，只是WFH是很難成事，如果配合其他對經濟不利的因素，很容易造成經濟衰退，甚至出現蕭條，屆時想返工都冇得返，被迫做「量地官」，在屋企行來行去，Walk From Home。

隨時變Walk From Home

近日有很多舖頭執笠，包括一些老牌健身中心，很多人唔明白，那些健身中心已經生存了很多年，點解突然間有咁多間執笠，原因是WFH。那些收費昂貴的健身中心，大多數設在商業區，不少在職人士在放工之後去健身中心玩番一兩個鐘，如果要應酬就繼續，如果冇應酬就返屋企；但如果WFH，唔通專登出去商業區健身，冇人健身，那些健身中心想唔執都唔得。

WFH令通勤人士減少，出外食飯的人減少，甚至商務應該都減少，影響到少了人搭的士、出外用膳，或者只是去茶餐廳或者用兩餸飯解決早午晚三餐。經濟學001都講，經濟繁榮是建築於消費之上，WFH令大家消費減少，經濟又點會繁榮。好彩現在WFH的人不多，因為在職人士知道，如果繼續WFH，最終以後都唔使返工。

當然，我們又不能將香港經濟衰退賴晒WFH，利息高企、銀行收緊信貸，甚至股樓下跌亦有很大影響。外圍因素唔好，大家更加要跑多兩步，現在仲講WFH好處，真係唔知生意難做，要香港走出經濟衰退陰影，首先就要取消WFH。