2024/09/10
湯文亮
近日有不少人叫我順應潮流，多些發表叫人租樓、唔好買樓的文章，我話唔係唔想發表，叫人唔好買樓幾咁容易，淨係話買樓之後要孭上一筆巨債，有乜依郁，就會變成一個負資產者。
事實上，我係唔敢發表，因為唔買樓只是當家男人的意願，家人並不支持，如果當家是女人，就算要死慳死抵，一定會買樓。
我相信大家睇評論文章，不少專家都發表叫人唔好買樓的言論，或者唔係唔買，只是現在樓價太貴，如果跌一半，他們就會考慮，但從來睇唔到那些人的太太或者子女，挺身支持那人的言論。
由此可見，那些人唔買樓只是他們個人的意願，得不到家人的支持，最奇怪就是連家人都唔支持，點解要其他人聽他們講唔買樓，甚至要將自住單位賣走。
有人話那些人是言不由衷，如果他們打算租樓，就應該叫人買樓，愈多人買樓，代表租樓的人減少，租盤增加，他們可以用較便宜的租金，租用較優質的物業，如果多數人租樓唔買樓，租金自然上升，那個叫人租樓唔好買樓的人豈不是搵自己老襯，而事實上那些人是暫時未有能力買樓，叫人唔好買樓只是掩飾自己弱點，如果某日他們買樓，就唔會記得以前叫人唔好買樓的言論。
其實勝負很明顯，叫人唔買樓的人大多數是以孤家寡人出現，但如果是買了樓，尤其是一些唔錯單位，就會全家總動員，父妻曬恩愛兼父慈子孝，信邊個大家自己決定，不過，是否買樓就真的要量力而為，最緊要是有無需要，以及自己是否能夠負擔，否則，就會好事變憾事。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
