2024/09/09
湯文亮
星期六早上自己揸車回公司，在停車場司機接手時話，有一名司機問我們的車位賣唔賣，佢老闆願出高價。不過，我唔明白，因為在年初時，有業主放售一批車位，當時冇人買，我們用低價買入一批，當幫助行家，其後很快便全部租出，我亦沒有放在心上，點解今日那名老闆要出高價買車位？
我回到公司，睇吓各類型物業空置率，豪宅、甲廈、商舖、工廈都是十幾個巴仙，只有車位，雖然只有幾百個，不但全部租出，租金唔錯，而且仲有租客輪候，市面上的確唔係咁好，點解車位咁好租？
記得在2000年時，我們已經買車位，而且買了很多，當時的空置率好高，有一個百多個車位的停車場，只有7個租出，出租率唔好，我們才有機會以低價買入大量車位，今日車位出租率普遍不錯，業主賤賣是個人財務問題，並不反映車位的真正價值。
車輛數目是直接影響車位價值
我打電話問一個開車行的老友，生意如何，老友話可以講好，亦可以講唔好，整體銷售金額下跌，但車輛數目上升，伙記做到氣咳，不過就搵唔到錢，兩餐是冇問題。
究竟數目多了幾多，如果唔係老友講，我一定唔會相信，原來今年上半年新車登記數目多了逾27%，以電動車佔多數，幾百萬一部的名車就不多。
老實說，車輛數目是直接影響車位價值，多了27%新車登記，雖然並不是多了27%車輛數目，暫時影響不大，但假以時日，如果新車車輛登記數目能夠保持，車輛數目比現在多兩成亦不是夢話，車位的價格會如何，懂得投資的朋友識得諗。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
