《銀行唔call loan 小心樓市V彈》

星期五下午，見到中原指數仍然下跌，不少專家愈來愈有信心認為今年樓市會下跌10%。我反其道而行，雖然今年只剩番4個月，我仍然有信心今年樓市會持平，明年就會飈升，有人不明白，香港經濟唔好，不少舖頭或者公司執笠，究竟我的信心從何而來。

舖頭或者公司執笠，是受沉沒成本所累，執笠是一個解脫，正所謂不破不立，亦是另一個開始，反而會刺激經濟，否則只有陰乾香港。

影響樓市有5個因素，首先是「辣招」，並不是批評政府是否應該設立「辣招」，但唔應該向非香港人徵「辣招稅」，因為咁樣做會影響人口增長，一個城市人口下降，經濟必壞，樓價一定下跌，現在政府「撤辣」，以及容許大量專才和優才移民來港，對香港樓市一定起支持作用。

好多認定樓市下跌的人解釋唔到點解樓價下跌、租金上升，其實好簡單，唔合理現象就解釋唔到，不少租客其實是準買家，但礙於某些情况，現在未能買樓，當那些情况緩和，他們就會立刻買樓，屆時樓價就會飈升。

利息高企，定存高過租金回報，有能力買樓的人點解唔做定存租樓住，不過，在35萬億美元債務壓力下，美國聯儲局很快開始減息，而且會又快又狠，樓市將會成為最得益受惠者，樓價必升，不過，仍然要過最後一關。

不少人根本沒有打算賣樓，但銀行call loan，不得不賣；不少有能力的人打算買樓，但銀行唔批，想買都唔得；銀行call loan逼業主賣樓，又唔借錢畀人買樓，樓價又點會唔跌？好彩，銀行受到社會壓力之下，承諾做按揭，如果唔批，兩個星期之內就要通知申請人，與此同時，對於準時還款的中小企不會call loan以及追差額，冇咁多人賣樓，而又多了人買樓，樓價想唔升都難。