《移民外地 先考慮當地人》

幾年前，英國容許香港BNO護照持有人移居英國，「5年+1年」之後可以申請入籍，有不滿香港政府的老友打算一家移民去英國，臨行前向我「曬命」，仲話佢有得走，我就冇得走。

我同老友講，如果移民是攞多一個身分，的確冇問題，好似移民加拿大的人，有八成已經回流，但如果是長住，就要多作考慮，不是考慮本身問題，而是考慮當地原居民。試問有邊一個家庭喜歡招待親戚入住，因為家主知道，招待親戚入住，最後惹家人不滿，結果是初而口角，繼而動武。

英反移民社運難解決

老友當然唔理我，仲話我食唔到的葡萄是酸的，最近英國出現反移民社會運動， 英國政府嚴陣以待。其實，這個情况很難解決，因為並不是針對某一族人或者某個宗教，而是當地人與新移民，就算BNO護照持有人冇做過任何犯法甚至不利英國政府的事，都極有可能被當地居民針對，就算開一間餐廳，隨時都會被當地居民掟磚，損失事少，心理威脅極大，更何况現在英國的經濟環境不佳，搵唔到工作，或者工資被大幅削減，這口怨氣一定會向新移民發泄，新移民唯有逆來順受。

英經濟不佳 向新移民發泄

以前啲人點樣招呼親戚入住，他們用了一招叫「朝行晚拆」，其實是「朝拆晚行」，沒有固定睡牀，晚上才行牀，朝早拆咗佢，代表家主每一日都可以叫親戚離開。英國政府則用「5+1」，到埗5年之後可以申請永居，如果唔批，就唔該申請者返回原居地；現在咁嘅時勢，就算到期都暫時唔好申請住，萬一唔批，就要返回香港，好難面對香港班老友。