《樓市已有人「摩貨」賺錢》

上周五中原指數微升0.21%，很多人話大跌眼鏡，因為早一個星期前中原指數，在連續不斷的劈價蝕讓的情况下，只是下跌了0.06%，那些大跌眼鏡的人認為早一個星期唔跌，上個星期就會大跌。

香港人唔知點解，好鍾意睇到樓價下跌、劈價蝕讓的新聞，唔鍾意睇到有「摩貨」成交、有人賺錢的新聞，傳媒便投他們所好，集中報道劈價蝕讓的新聞，至於賺錢「摩貨」，就提都唔提，令到睇淡樓市的人非常開心，但大家就收唔到正確訊息，當樓價調頭回升，那些打算買樓而唔敢買樓的人就會怪責傳媒沒有提供正確訊息，只是一面倒話劈價蝕讓，而隻字不提有人炒樓賺錢。

港人喜看劈價蝕讓新聞

唔買樓未算傷，最慘就是那些在別人炒樓賺緊錢的時候，自己收唔到正確訊息，而低於市價將自住單位賣走，到最後即使醒覺再買返樓，發覺世界已經變了，銀行似乎唔多喜歡做物業按揭，要求比以前嚴格很多，令到打算買樓的人知難而退，賣了樓的人如果入唔返市，就要做冇殼蝸牛，而且仲唔敢話畀人知自己曾經是業主。不過，以低於市價將自住單位賣走而租樓住的人就會發覺樓市與傳媒所報道的有所分別，每一次續約業主都會加租，既然樓市咁差，點解樓價下跌，租金仍然上升。

影響樓價的五大因素，「辣招」已撤、人口上升、租金上升、利息準備下降、銀行終有一日會借錢畀人買樓，這五大因素最壞的情况只是維持現有水平，當利率下跌，銀行借錢畀人買樓，相信劈價蝕讓的個案不再出現，代之而起的就是有不少賺錢的「摩貨」成交，今日賣了樓的人就一殼眼淚。