《戒賭馬原因：贏馬輸錢》

我有一個賭馬好叻老友，不但自己有研究，仲有內幕消息，勝出率亦非常之高，但突然之間請食飯，高調宣布金盆洗手，大家都覺得很奇怪，不過，就冇人問點解。

雖然冇人問，但老友自己講出嚟，老友今年買了100場獨贏，有30場跑出，得勝率30%，以投注的時間計算，平均賠率超過4倍，但在投注之後，能夠勝出的馬匹賠率不斷下降，最後平均賠率降至3倍，以投注10,000元為例，只有3000元有錢收，如果4倍賠率，就會贏2000元，如果是3倍賠率，就要倒輸1000元，老友覺得並不是自己眼光唔好，而是輸在賠率，如果在他買馬的時候能夠確定賠率，他就是一個贏家。

其實，有很多人都是因為這個理由而戒賭馬，令到澳門馬場已經在今年4月執笠，新加坡馬場就捱至今年10月，雖然新加坡政府話收返馬場建組屋，其實是賭馬的人愈來愈少，投注額下降，迫不得已才執笠，香港馬會如果唔作出改革，恐怕賭馬的人會愈來愈少，最後步新加坡及澳門後塵，馬照跑都要收檔。

有人話，馬會是不會作出調整，我認為未必，當投注額不斷下降，馬會被迫要作出調整，情况就好似當年地產商用建築呎價賣新樓，買家在買樓的時候以為呎價好平，但到收樓發覺實用率非常低，久而久之，買樓的人唔再買樓花，寧願等新樓入伙時才買，適逢政府要求以實用呎價賣樓，地產商順水推舟，直至現在都是用實用呎價賣樓，如果馬迷有要求，甚至以實際行動拒絕賭馬，馬會是會作出讓步，老友話，如果馬會改革，賠率定於投注一刻，他會復出賭馬。