《銀行有入冇出 經濟蕭條》

我讀大學時，曾經在銀行做暑期工，其中一個任務，就是睇吓工廠客戶有冇「便秘」，當然不是個人衛生問題，而是廠家的流水帳。如果工廠只買入原材料而沒製成品出貨，代表工廠資金不足，可能將原材料轉售，工廠是有危機，銀行家叫那些工廠出現「便秘」，即是有入冇出，銀行是不會替那些工廠開信用狀買原材料，那些工廠很快就會執笠。

這個世界原來真係有十年河東，十年河西，以前銀行關注工廠有冇「便秘」，現在到香港銀行被關注點解出現「便秘」。有人問何謂銀行出現「便秘」，同工廠一樣，有入冇出，而且比工廠嚴重，工廠只是一條入數，銀行有兩條入數，銀行用高息定存搶客，向借貸比率合乎金管局要求的客戶call loan，但又唔借錢畀人買樓及做生意，究竟香港銀行的錢去咗邊，唔通有好多壞帳，銀行要搶定存兼call loan？

任何人去睇中醫，首先會被問及瞓唔瞓得，食唔食得，屙唔屙得，其實問都多餘，如果三樣都得，就唔使睇中醫。不過情况最壞不是三樣唔得，而是唔瞓得，食得唔屙得，中醫第一張藥方一定會係清熱去濕，首先令病患者屙得，第二張藥方就是開胃消滯，解決食得屙得之後，大半人已經好返，自自然然就會瞓得。

有人認為香港現時好似一個病人，不少人生意唔好，擔心銀行call loan，搞到唔瞓得，市面經濟蕭條，吉舖漸增，政府都唔知點樣解決。其實，關鍵在銀行，如果銀行唔再向借貸比率合格的業主call loan，而又借錢畀人買樓及做生意，市面一定可以很快回復生機，如果銀行堅持下去，香港經濟很快就會病入膏肓，醫返都嘥藥費。