2024/07/22
湯文亮
![](https://852images.oss-accelerate.aliyuncs.com/images/articles/00000/5116/thumbnail/1721613460475.jpeg)
香港樓價指數連續下跌5個星期,有老友話香港樓市將會繼續下跌,原因是一班學者在一個研討會上話香港樓市是一潭死水,樓市想唔跌都唔得。不過,學者唔知道,香港樓市如果是一潭死水還好,就算繼續下跌都唔會跌得幾多,而事實上香港樓市好似正在被抽乾的魚塘,唔使幾耐,當魚塘乾塘的時候,魚塘中的魚就會被捕捉,業主就是魚塘中的魚。
好多人唔信,香港有咁多銀行,甚至是國際級銀行,點解會冇水,點可以話香港樓市正在乾塘。老實說,香港業主真的不明白,在抵押品足夠之下,不少業主仍然被銀行call loan call到失魂,可以咁講,絕大部分業主在同樣的抵押品之下,欠銀行的錢比一年前少了很多,即是大部分業主被銀行抽了水。
乾塘捕魚 魚塘主人反受害
唔係每一個業主都準備充足,有實力不足業主就好似乾塘的魚,被迫賣走部分抵押品,如果長此下去,銀行繼續call loan,又唔借錢畀人買樓,總有一日,樓市會乾塘,所有業主都變成乾塘的魚,任人捕捉。
不過,魚塘的主人亦知道,雖然乾塘可以輕易捕捉漁塘的魚,但魚塘乾塘之後,冇三五年都唔可以飼養到足夠斤両的魚,換句話說,乾塘捕魚等於殺雞取卵,最後受到最大傷害的反而是魚塘主人。
所以,有經驗的魚塘主人是不會讓魚塘乾塘,他們在水位較淺時捕捉體積較大魚,除了可以賣得好價錢之外,最大目的是讓較少的魚在沒有大魚虎視眈眈之下,可以較容易繁殖生存,否則,整個魚塘最後只得幾條大魚,本來可以賣到錢的魚都被大魚食了,不合生計。
(本網發表的文章若提出批評,旨在指出相關制度、政策或措施存在錯誤或缺點,目的是促使矯正或消除這些錯誤或缺點,循合法途徑予以改善,絕無意圖煽動他人對政府或其他社群產生憎恨、不滿或敵意)
▸更多文章:投資心得文章 | 湯文亮 紀惠集團行政總裁
(文章內容純屬作家個人意見,並不代表本網頁立場)