《大減價後回復正價 生意更差》

星期日與老婆行中環，老婆去名店買包包，叫我去平日很鍾意去的英國百貨公司買嘢，我話唔去，老婆以為那一家英國百貨公司的品質差了，其實唔係，我仍然很鍾意那一家百貨公司的貨品，但在3個月前，我收到一個由百貨公司發出的短訊，憑着短訊去買嘢，可以有七五折。最初我以為是講笑，或者有設限，但原來是真的，而且沒有設限，買任何貨品，買幾多都可以，我於是買了很多。

不過，自此之後，我冇再去那一家百貨公司買嘢，因為我覺得，如果我買了之後收到短訊，豈不是很蝕底，我寧願等收到短訊才去買。

有不少人認為，生意唔好，減價是促銷不二法門，老實說，的確如此，不過，當回復正常價格之後，生意往往會更差。據聞，曾經將叉燒飯減到10元一盒的舖頭，在回復正價之後，生意大幅減少，因為去買叉燒飯的人會認為，用超過一倍價錢買以往10元可以買到的叉燒飯，認為老闆很暴利，寧願幫襯第二家，大幅減價的老闆未必知道這個後果。

會被認為牟取暴利

有人話，真係唔知點解，近排執笠的舖頭比疫情的時候仲要多，其實，這也是大減價之後後遺症。在疫情的時候，不少舖位業主與租客共渡時艱，大幅減租，在疫情之後，租金回升，但租客唔適應，認為業主暴利，寧願執笠唔做生意。其實，一個食肆舖位租金，在疫情前佔營業額15%至18％，最近則佔13%至15％，已經為租客創造了一個良好營商環境，但租客仍然話太貴，寧願唔做都唔租，業主都冇辦法。有零售業協會主席叫業主大幅減租三成，而事實上租金所佔主席那個行業的生意額1.2%，以往是2%至3％，仲要大聲疾呼叫減租，真的是無話可說。

其實，不少業主寧願個客唔租，他們可以用市值租金將舖位再租出去，市值租金往往大幅高於現有租金，租客其實是受到疫情時大減租所累，認為現在租金太高，寧願唔做生意都唔租。不過，姣婆守唔到寡，租客很快就會再租一個租金仲貴，地點又冇以前咁好的舖位做生意。