《老婆做定存 老公借貴利》

有老友同我呻，佢畀銀行call loan call到失魂，冇辦法唯有賣樓，但唔係話賣就可以賣，在未賣到樓之前，唯有借貴利來應付銀行call loan。老友知道佢老婆有一筆大錢，用嚟還銀行call loan綽綽有餘，但佢老婆話早已將那筆錢做了定存，銀行仲畀超過4厘息，老友聽到之後冇晒表情，因為佢借貴利要畀8厘息，仲唔敢講畀佢老婆知，真係人都癲。

我問老友有冇睇電視劇，佢話以前就有，已經冇睇好耐，一集《愛．回家》都未睇過，我問有冇睇過《朱門怨》，佢話睇過，不過唔記得講乜。

《朱門怨》講述一個有名望大家庭，不過只是老竇有名望，子女是不善生產的二世祖，當中二少三少只是靠家用過日子，每逢過時過節就要由帳房搭路，問其他人借錢。與此同時，二少奶三少奶儲落不少私己錢，同樣由帳房搭路借出去，於是，在不知情情况下，二少奶借錢畀二少，三少奶借錢畀三少，自己人借畀自己人，完全沒有風險，帳房袋袋平安。

有很多人唔明白，銀行點解要用咁高息搶定存，我認為其中一個原因，就是如果唔用高息搶定存，不少人將會用做定存的資金來清還銀行call loan，銀行就會做少很多生意。高息搶了定存之後，銀行的存款增加，在符合《巴塞爾協定III》的條件下，銀行可以增加貸出款項，包括一些利息較高的短期貸款，利息收入亦會增加，而且好似二少奶借錢畀二少一樣，絕對沒有風險，甚至好評如潮。首先做高息定存的人一定很開心，其次是獲得短期貸款的債仔，就算畀貴少少利息都好開心，所以，銀行唔係咁輕易提高按揭貸款成數，因為會減少很多人被銀行call loan，銀行就會少收很多利息。