2018/09/18
杜鳳儀
月初才送走[飛燕], 之後又到[山竹], 筆者跟好多前缐嘅保險從業員一樣, 這兩天電話響個不停, 全部都係關於理賠嘅查詢, 颱風嘅威力真係唔講得笑, 上年[天鴿]加上另外4次颱風, 全港保險業未計算車保及旅遊保, 總索償金額達9億多港幣, 財物損失相當驚人. 相信今次[山竹]財產損失都不惶多讓.
天文台响上周三已經預先通告[山竹]將於上周日最接近香港, 威力大到連航空公司都預早通知所有航班取消, 買咗旅遊保險响上周日出發嘅人可能坐定笠六, 今次咪揾保險公司埋單, 但原來大部分嘅旅遊保險都唔包[出發地點]取消旅程保障架, 只有少數嘅寶號才接受索償, 至於[出發地點]係講緊香港, 除惡劣天氣之外, 如果出發前一星期{目的地}發生受保人不可預見之罷工、騷亂、暴亂、恐怖活動、傳染病或天災等都可以透過保單內嘅取消行程進行索償. 想知道邊間寶號包呢d保障, 可瀏覽筆者嘅臉書專頁就知道答案.
睇到呢到, 可能你會講, 依家至講遲唔遲d? 一d都唔遲! 近年全球暖化讓海面溫度升高, 助長了颱風威力! 君不見最近颱風侵襲越來越多? 所以後知後覺唔緊要, 最怕係不知不覺. 不過最近明顯地發現真係多咗人投保旅遊保、家居保、業主保等計劃. 因為無法預計嘅惡劣天氣所帶嚟災難性財務損失, 風險管理確實刻不容緩.
其他因爲颱風引致嘅財產損失索償個案會陸續跟大家分享, 最後提提大家, 如果[山竹]令到閣下有任何財物損失, 記得儘快同你嘅保險顧問報告, 一般保險公司嘅申索時限通常都係發生事故30天內需要提出的.
（文章內容純屬作家個人意見，並不代表本網頁立場）
贊助
