《有錢佬的「壞習慣」》

最近寫過一篇文章關於Nvidia（英偉達）（美：NVDA）行政總裁黃仁勳請客，以5000元新台幣一席包一瓶紹興酒請業界其他大佬或者物料供應商，簡直是侮辱他們，立刻畀人口誅筆伐，台灣人唔在講，不少香港人亦鬧到我飛起，他們話Nvidia曾經超過微軟（美：MSFT）、蘋果（美：AAPL），總市值是世界第一位，我冇資格教黃仁勳做有錢佬。我覺得很奇怪，如此來說，一定要係球王才可以做足球教練？

有錢佬有幾個壞習慣，大家可能唔察覺得到，一般人以為約有錢佬食飯，對方一定會遲到，所以自己都遲到，但去到的時候，見到有錢佬在坐，不但沒有抱歉，而且仲會話有錢佬有職員做嘢，自己唔使做，所以可以準時到達。有錢佬無端端畀人話，當然唔開心，傾生意自然唔會咁暢順，其實，「準時」是有錢佬的一個「壞習慣」，他們唔想畀人話有錢就可以遲到。

「闊佬別人 孤寒自己」

有錢佬經常帶一些名牌手表、揸名車，有人話他們演嘢，其實，這是另一個「壞習慣」是「貴買平用」，有錢佬知道，唔用的名牌物品是最貴，所以，不少有錢太太帶十幾萬元包包去買餸，一般人以為她們浪費，其實，只是貴買平用。

有不少人見到有錢佬獨自在茶餐廳食碟頭飯，便會懷疑有錢佬是否經濟出現問題，仲周圍同人講，但其他人，尤其是一些比較有錢的人知道，這只是有錢佬另一個「壞習慣」──「闊佬別人，孤寒自己」。請客的時候一定要尊重對方，自己點食都可以，所以，見到有錢佬一個人食碟頭飯，千祈唔好大驚小怪。

有人見到有錢佬排隊買飛，覺得很奇怪，有錢佬只要一個電話便有人送到上門，而且仲唔會收錢。老實說，有錢佬是知道的，但是他們擔心，今日佔了小便宜，日後那些曾經幫有錢佬的人有要求，有錢佬是很難拒絕，否則就會畀人講間話。做有錢佬唔易，而且做咗有錢佬之後識做有錢佬更加唔易。