《賣了樓的人是樓市後盾》

同事同我講，有一個朋友蝕本賣了樓之後，發覺很難租樓，不但地方冇以前咁好，而且業主乜都唔會負責，有一次稍為猶疑，單位已經被人用高價租了。冇辦法唯有速速租樓，現在打算買返樓，不過真係別時容易見時難，到現在要買樓的時候，才發覺賣走的單位是最好的，現在根本搵唔返，唯有考慮買新樓，否則，就真係要移民。

很多人唔明白，在香港有資格賣樓的業主其實不多，首先一定要有兩個單位，只得一個自住單位除非是移民，否則不能夠話自己有資格賣樓，但有資格或者必須買樓的人則源源不絕，如果不是內地經濟稍弱，以及港匯高企，香港樓價是不會跌咁多。不過，現在應該大局已定，利息只有減而不會加，租金只會升而不會跌，移民離開的人會愈來愈少，來港工作及定居的人愈來愈多，影響樓價的最大因素人口數量，總數已經止跌回升，樓市已經過了最壞的時候，現在只睇銀行取態，如果銀行願意借錢畀人買樓，樓價想跌都難。

同事話離婚的人如果不是已經有第三者，是不會咁容易再結婚，見過鬼怕黑了。由此可見，賣了樓的人是不會咁容易再買樓；不過，同事可能搞錯，賣了樓的人是樓市最堅強後盾。首先，賣了樓之後有一大筆現金，可以支持業主供樓，如果被迫搬幾次樓，就會懷緬昔日做業主的時候。老實說，只有剛剛賣了樓的人才會話樓市會大冧，賣了樓幾年的人是不會講，他們明白，每月花錢替人供樓，好似替人養仔一樣，心裏絕不好受，如果有能力，他們一定會再買樓，只要那些賣了樓的人再買樓，樓市就可以講雨過天青，現在是雨過，還未天青。