《小紅書應教人窮遊中國》

星期日父親節，請幾位由外國嚟嘅新租客家庭食飯，冇辦法，市道弱，要自己搞吓公關，有租客老婆話，他在台灣時，不時聽到台灣大媽話中國很窮，連茶葉蛋都食唔起，本來佢唔信，但有台灣大媽話小紅書教中國人窮遊香港、澳門，點樣可以在澳門免費食雲吞麵、飲奶茶，搞到澳門政府要出面禁止賭場供應免費食物，所以，現在她半信半疑。

租客老婆講半信半疑只是客氣說話，肯定信到十足，但又難怪她，小紅書今次真係丟架，我幼承庭訓，就算自己幾窮，都唔可以畀人知，那些免費食物，除非唔試，試過一定會買。賭場供應免費食物，只是做生意手法，那些食物好似冇鈎魚餌，在釣魚之前，職業漁夫會倒一大堆魚餌落海，魚類開始時是會很小心進食，但食食吓就唔會理，很大機會食到有鈎魚餌，最後變成人類席上珍饈，那些貪圖免費食物的窮遊客，最後都會變成賭徒，為賭場供應利潤。

拿了着數會樂意宣傳中國

現在大國崛起，小紅書教人窮遊港澳，簡直是有辱國體，應該掉轉嚟做，教外國旅客點樣可以窮遊中國，而又受到尊重，例如坐綠皮火車代替高鐵，如何買到價錢平而又優質食物，而事實上中國食物是很便宜，應該不難做到，至於住宿，可以去那些長途客運站，或者公路上的加油站，通常那些加油站都設有大型住宿地方，小紅書要記住，那些得到着數的人是會樂意宣傳中國。教中國人窮遊港澳，就難怪有人話中國很窮，人必先自侮而後人侮之。

如此類推，香港政府亦應該教人窮遊香港，例如在某些時段，食物會比較便宜，如何節省交通費，或者去攞旅遊發展局的優惠，自己大方一點，攞到着數的人都唔會講香港壞話，或者唔應該叫窮遊，叫精算遊香港比較好。