《星打擊洗錢 恐失「紐倫坡」》

我有一個做金融的租客兩年前搬去新加坡，佢話香港對於資金流動管得太嚴，即是唔可以「洗錢」，正所謂水清無魚，香港好快會失去金融中心地位，真係好嘅唔靈醜嘅靈，「紐倫港」變咗做「紐倫坡」。老實說，如果新加坡可以「洗錢」，香港永遠唔可以做返「紐倫港」。

有一個做金融業的租客同我講，他不是不想留在香港，但香港對於資金流動真係管得太嚴，甚至客戶想在香港開戶口，都會被查家宅，最後都係開唔成，銀行解釋是因應美國的要求，如果稍有不慎，會被美國罰款罰到黐線，銀行寧缺勿濫，做少一單生意沒有影響，連戶口都開唔到，又點可以做金融中心？不過，新加坡就唔同，唔好講到「洗錢」咁複雜，首先是開戶口是非常容易，唔會查家宅，以後資金流動更加冇人理，所以，新加坡可以輕易打低香港。

大家唔好以為在香港，從銀行攞十萬八萬現金出嚟會被銀行職員問用嚟做乜，就算存十萬八萬入銀行，職員同樣會問點解有咁多錢存入銀行。最初的時候，很多人都不習慣，認為錢是自己的，攞錢存錢點樣用，點解要同銀行講；但現在已經習慣，在攞錢存錢之前，已經諗定一套說法。老實說，就算亂噏，銀行職員都不會質疑，他們就是要市民習慣，大額現金流動是受到監管，唔係咁容易「洗錢」，對於那些有可能「洗錢」的金融公司，當然唔會以香港為基地，新加坡是代替香港的最好地方。

近日我有不少豪宅租客由新加坡轉到香港，我以為新加坡的生意做唔切，漏一啲畀香港，但原來是新加坡打擊「洗錢」活動，新租客話，如果星港兩地都唔可以「洗錢」，點解要去新加坡，由此推算，新加坡打擊「洗錢」活動，有可能不能做「紐倫坡」。