《唔好太早擺慶功宴》

幾個月前，老友擺慶功宴，原因是他的舊樓有地產商收購，已經達到了強拍百分比，他準備坐喺度收錢，但幾個月來都聽唔到老友講有關收購的事。老友話，今次真係老貓燒鬚，地產商在最後一刻，見地產市道唔好，叫停了強拍，不但見財化水，而且仲唔知點樣同其他人解釋。

最近歐洲有一項20公里競步國際賽，西班牙女子選手以為自己可以攞第三，在未過終點前與支持者揮手慶祝，非常風騷，誰不知在過終點前一刻，被烏克蘭女選手過頭，最後連銅牌也沒有，這還不算，這個視頻上了全世界的熱搜，那名女選手真係唔知點樣面對全世界。

做物業買賣有一個戒條，就是千祈唔好太早擺慶功宴，最好是完成交易才擺。不過，到了完成交易時，可能熱情已過，受惠者都沒有興趣擺慶功宴，很多時在簽訂臨時買賣合約之後，受惠者已經急不及待擺慶功宴。其實，這個做法是很危險的，對手知道之後，可能覺得自己蝕底了，繼而想辦法取消交易，例如「踢契」等，最低限度都會要求更多利益，否則，就威脅取消交易，受惠者見到自己已經擺了慶功宴，迫不得已答應對方要求，利益相對減少。

有人話賺到大錢唔擺慶功宴，如富貴不還鄉，錦衣夜行，我認為如果是一個大項目，對手是一大堆買家或者業主，完成交易後對雙方都有利，咁樣就一定擺慶功宴。如果對手只是一人，擺慶功宴的一方有機會被人懷疑是侮辱另一方，唔擺好過擺。