《如何幫助欠租租客》

有老友問，在疫情時，甚至解封之後，不少租客欠租欠到不得了，收租業主如何處理欠租租客，是否如坊間所說，業主是無良的，唔交租就踢他們走。

我唔知其他收租業主的做法，但我們首先會與租客商量，如何分期交回欠租，如果租客暫時未有能力交回欠租，最低限度都要準時交租，半年之後租客才開始慢慢交回欠租。老友話，咁樣都唔係太無良。老友可能唔知道，如果我們逼得太緊，租客唯有「躺平」，根本唔會交租，任由業主收樓，可能都要幾個月時間，業主損失更大，又幫唔到租客，又會被人話無良，况且不少租客主動交欠租利息給業主，其實唔係好多，不過，以示租客誠意。

老實說，講到無良，有排都未輪到業主，不少收租佬同我投訴，銀行不斷將物業估值降低，不斷向業主追差價，不少業主已經賣走手上股票及金融產品來滿足銀行要求，甚至連手上的自住單位或者自用寫字樓都要賣走，仍然未能滿足銀行要求，唯有「躺平」，根本唔理銀行，又唔交利息，任由銀行封樓，將物業變成歸銀行。其實銀行心知肚明，將銀主盤賣走之後，仍然有一大筆現金退回給業主，外人就會咁睇，銀行手上的抵押品足夠有餘，點解仲要call loan call得咁急，對銀行的商譽不利，除非在賣樓之後，銀行仍然有所損失，為了維護自己利益，銀行不得不call loan，大家一定會見諒。

老友問我銀行應該點做，我認為應該學部分收租佬做法，收租佬凍結欠租，但新租就要準時交。銀行應該凍結按揭客戶貸款，在未來一段時間，或者是一年，客戶只需要還息，暫時不用還本，畀時間收租佬賣走一些物業，而銀行貸款又沒有惡化，總好過想辦法對付一個「躺平」客戶。