2024/05/31
湯文亮
最近有一間連鎖式茶餐廳執笠，原來已經欠租5個月，唔知點解，執笠群組竟然收唔到消息，如果係其他舖頭，好似山頂餐廳，未開門營業已經話疑似執笠，或者是同路人輕手一啲。
有老友問我，那間茶餐廳點解會執笠，我認為是改錯名，而且是兩次，做飲食有一戒條，如果食肆餐廳改名，叫「阿嫂」可以，叫「阿哥」不能。灣仔有一間叫阿嫂茶餐廳旺到阿媽都唔認得，舖位加大一倍後仍然要排隊，如果那間茶餐廳叫阿哥可能有相反效果，人客入嚟幫襯已經變咗做客官，又點可能要求客人叫你做阿哥，如果連呢啲都唔識，執笠真係冇得講。
老友唔明白我點解話那一間執笠茶餐廳錯了兩次，其實，從法文直譯是「乜哥」的茶餐廳，但唔知點解變成「大乜哥」茶餐廳，入嚟幫襯的客人立刻變成小弟弟。我就唔介意，不過有很多人非常介意，有人介意，生意自然差了，執笠亦唔出奇。
不過話分兩頭，如果出品好、服務佳，就算叫阿哥，生意都可以做得很好，否則，叫小弟都冇用。香港人是非常現實，不少人唔滿意中國政府，但經常北上消費，仲代為推廣，話深圳平靚正，唔知道內情的人以為他們是親政府分子。
不過，如果是別人主動叫阿哥，真的是值得自豪，只有是行業領軍人物，或者是社會精英分子，才會被人稱做阿哥。如果是自己認做阿哥，只會令人敬而遠之，有邊個人鍾意叫一個唔識的人做阿哥，仲要畀錢佢賺。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
