《早知燈係火 唔使隨處摸》

上周五中原指數繼續下跌，已經連續下跌4個星期，今次跌幅擴大，接近1.5％，「撤辣」之後樓價升幅差不多全部蒸發，一向睇淡樓市的人立刻話，香港樓市弱勢已成，就算「撤辣」都冇用，對於樓市支持者來說，事實勝於雄辯，的確無話可說。不過，影響樓市升跌不止「辣招」，還有利息以及銀行對樓市的態度。

有人話我搵藉口，其實不是，自從美國聯儲局去年暴力加息之後，樓市才下跌得比較急，在加息之前，即使經歷3年疫情，樓市仍然可以保持平穩，加息之後，利息由2厘在短短幾個月提升至接近6厘，不少業主本來每月租金收入是有盈餘，但加息之後就變成入不敷支。如果投資者現金流控制唔好，唔好講再買樓投資，甚至要賣走手上一些物業，來達到收支平衡，多人賣、少人買，樓價想升都難。不過，大家亦不用太悲觀，歐洲預備開始減息，美國亦不用等太久，當美國開始減息，樓市就會重拾升軌。

有一個大家都想唔到的樓市下跌因素，就是銀行唔願意借錢畀人買樓，按揭貸款業務差不多全線暫停。不但如此，銀行除了唔借錢畀人買樓，仲向不少做了按揭貸款的業主call loan，結果可想而知。所以，在「撤辣」之後樓市仍然不能飈升，這是一個主要理由，亦是不幸中之大幸，如果政府唔及時「撤辣」，樓市有機會大幅調整，不少業主會被銀行call loan call到失魂，甚至要出售手上最優質的物業。

政府官員睇到銀行唔放貸、追差額，令到樓市下跌，不期然會話「早知燈係火，唔使隨處摸」，當日不用推出「辣招」，只是吩咐銀行不但停止做按揭，仲要以樓價估值下跌為理由，即使他們按時還款，一樣要向業主追收差額，咁樣做樓價一定會下跌，既然樓價下跌，政府就不用推出「辣招」。况且，追差額、唔做物業按揭，是銀行的商業決定，政府不會被人話干預自由市場，一個在自由經濟的社會，大逆不道的政策。