2024/05/23
湯文亮
近日有幾層非常優質甲廈售出，價錢又唔貴，唔使問阿貴，業主一定被銀行call loan，無計可施之下，又唔想物業變成銀主盤，唯有賤價出售。老實說，如果不是擔心銀行向公司call loan，我亦會考慮買入，現在當然唔敢，留返啲錢傍身，今日講當然是合情合理，其實，幾年前我已經係咁講，當日畀人笑到面黃。
對於銀行近日不斷向依時還款客戶call loan，我問一名銀行家，根據國際慣例，銀行是唔會向依時供款的客戶call loan，現在銀行打破這個慣例，不但向依時還款，甚至有足夠抵押品的客戶call loan，以後銀行要搵生意就很難，唯有做其牛後，參加一些銀團貸款，借十億八億畀人，仲要多謝大債仔畀生意自己，係咪自作賤。
銀行家話大家誤會了，他們亦有苦衷，現在賤價賣走優質甲廈的事，不是今年才發生，債仔已停止供款好幾年，銀行追數亦追咗幾年，由於借貸比率很低，債仔認為銀行的風險不大，所以總是有拖冇欠，更加不會問其他財務機構借錢供款，因為利息一定會比銀行高得多。唔供款是大忌，講乜都冇用，折騰幾年之後，銀行唯有逼客戶賣樓，而客戶亦自知理虧，所以唯有賤賣物業。
我認為大家的確誤會了銀行，不過話分兩頭，銀行最近的確向依期供款、借貸比率合格的客戶call loan，甚至令到金管局出聲話銀行不要向依期供款的客戶call loan，更加唔好改變貸款額度，咁樣做是破壞銀行信譽，金管局是幫銀行而非害銀行。不過，現在的銀行家是很小心，寧願得罪客戶都不敢逆銀行的意思，否則如果被炒，銀行是會向他們call loan。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
